தேவாலயத்தில் மணமகனும் மணமகளும், "வாழ்விலும் தாழ்விலும் இணைந்து வாழுவோம்," என்று வாக்குக் கொடுத்து, இறையருள் வேண்டி நிற்கின்றனர். அப்பொழுது மங்களகரமாக ஒலிக்கும் பாடல் எது தெரியுமா?

"மங்களம் செழிக்கக் கிருபையருளும் மங்கள நாதனே" என்ற இப்பாடலே!

"இப்பாடல் பாடப்படாத கிறிஸ்தவத் திருமணமே தமிழ் உலகில் இல்லை," எனக் கூறலாம்! திருமண வைபவங்களில் அனைவரும் விரும்பிப் பாடும் இப்பாடலை இயற்றியவர் தஞ்சை ஆபிரகாம் பண்டிதர் ஆவார்.

ஆபிரகாம் பண்டிதர் தன் பிள்ளைகளின் திருமணங்களை நடத்தியபோது, இயேசு பெருமானுக்கு முதல் அழைப்புப் பத்திரிகையை வைத்து, திருமண அழைப்புக் கொடுப்பது வழக்கம். இறைவனை அவர் எவ்வளவு உரிமையோடு அழைக்கிறார் என்பதை அவர் இயற்றிய மற்றொரு திருமணப் பாடலில் காணலாம்.

திருமண வைபவ ஆயத்தங்களின் பலவித வேலைகளில் அமிழ்ந்து தவிக்கும் வேளையில், அழைப்பை ஏற்று , கானா ஊர்க் கலியாணத்தில் வந்திருந்து , குறைவை நிறைவாக்கிய நம் இறைவன் இயேசு, இம்மானுவேலாக நம்மோடு இருக்கிறார், என்ற நல்நம்பிக்கை, எத்தனை ஆனந்தத்தையும் புதுபெலனையும் நமக்களிக்கின்றது!

ஆபிரகாம் பண்டிதரின் வேண்டுகோளுக்கிணங்கி , அவரது இல்லத்தில் நடந்த திருமணத்திற்கு இறைவன் ஒருமுறை ஓர் ஏழைச் சிறுவனாக வந்ததாகவும், யாரென அச்சிறுவனை அவர் வினவியபோது, மரியின் மைந்தனெனக் கூறி மறைந்ததாகவும் கூறப்படுகிறது. இச்சம்பவத்தையே ஆபிரகாம் அவரெழுதிய ஒரு பாடலில் வெளிப்படுத்துகிறார்:

ஆபிரகாம் எழுதிய மற்றுமொரு திருமணப் பாடல் லாலிப் பாடலாகும். தமிழ் நாட்டில் மணமகனையும் மணமகளையும் ஊஞ்சலில் இருத்தி, பெண்கள் அவ்வூஞ்சலை ஆட்டி, லாலி பாடுவது மரபாகும். இதையே, ஆபிரகாம் ஞான மணவாளனான இறைவனைத் தம் உள்ளமெனும் ஊஞ்சலில் இருத்தி, லாலி பாடி மகிழ்கிறார்!

நாதவடிவான இறைவனை ஆராதிக்க மிகச்சிறந்த வழி, அவரைப் போற்றிப் பாடுவதே. எனவே, நம் வாழ்வின் அனைத்து வைபவங்களிலும், நாத நற்சொரூபனை நாமும் பாடித் துதிப்போமா?